Ака уйăхĕн 21-мĕшĕнче Приволжски пĕтĕмĕшле пĕлÿ паракан тĕп шкулта И.Я.Яковлев çуралнăранпа 175 çул çитнине халалласа  «Чĕвĕлти чăваш чĕлхи» фестиваль иртрĕ. 8-мĕш класра вĕренекен Осипова Татьянăпа Яруков Михаил  программăна кăсăклă ертсе пычĕç. Уява пухăннă ачасем малтан вăйă картине тăчĕç, Чăваш Республикин Гимне юрларĕç. «Чăвашсене çутта кăларакан сумлă та чаплă педагогăн,  Иван Яковлевич Яковлевăн ятне Чăваш енре çеç мар, Раççейре те, ун тулашĕнче те пĕлеççĕ. Эпир унпа мухтанатпăр» , - тесе палăртрĕç 7-мĕш классем. Вĕсемех И.Яковлевăн  «Чăваш халăхне панă халалĕнчи» йĕркесене пăхмасăр каласа куракансене чăваш халăхĕшĕн тăрăшма, ырă пулма, ырă ĕç тума, чи пĕчĕк ĕçе те юратса тума, çемьене упрама чĕнчĕç.

Кашни класс паян хăйĕн пултарулăхне кăтартма тăрăшрĕ. 3-мĕш класра вĕренекен Краснова Викăпа Сергеева Настя «Анне»,5-мĕш классем «Улми лайăх-и?», 6-мĕш классем «Кай-кай, Ивана»,8-мĕш классем «Ах, аннеçĕм, анне» юрăсене шăрантарчĕç. «Мерчен» ушкăн хĕр ачисем «Асанне çÿпçинчен» сценкăна  выляса пачĕç. 9-мĕш класс каччи Ефремов Роман «Пире тăван кĕтсе тăрать» юрăпа пурне та савантарчĕ.

Пирĕн чăваш çĕр-шывĕнче çĕр пин сăмах, çĕр пин юрă, çĕр пин   тĕрĕ, çĕр пин сăвă. Пирĕн чĕлхе илемлĕ, янравлă та пуян, çепĕç те хăватлă пултăр ялан.

Семенова В.Г.